«Наврӯз-иди занони ваҳдатсаро». Дар шаҳри Хуҷанд Форуми байналмилалии занон баргузор гардид

Форум бо ибтикори Кумитаи кор бо занон ва оилаи назди Ҳукумати Ҷумҳурии Тоҷикистон дар ҳамкорӣ бо Мақомоти иҷроияи ҳокимияти давлатии вилояти Суғд ташкил ва баргузор карда шуд.

Дар форум муовини Сарвазири Ҷумҳурии Тоҷикистон Дилрабо Мансурӣ, Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода, муовини Сарвазири Ҷумҳурии Узбекистон Зулайхо Баҳриддинова, Президенти Конгресси занони Қирғизистон Замира Акбагишева иштирок ва суханронӣ намуданд.

Муовини Сарвазири Ҷумҳурии Тоҷикистон Дилрабо Мансурӣ иброз дошт, ки баргузории чунин форумҳои байналмилалӣ дар самтҳои афзалиятнок ва майдони фарох барои баланд бардоштани нақши занон дар баррасӣ ва ҳалли масъалаҳои муҳими давлатӣ имконияти мусоидро фароҳам меорад.

Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода зимни форум меҳмононро ба ҷашни байналмилалии Наврӯз табрик намуда, иброз дошт, ки ҳамкории ҷонибҳо ба рушди шарикии стратегӣ, таҳкими дӯстӣ, ҳамсоягии нек ва ҳамкории зич байни кишварҳои бародар такони нав мебахшад.

Мардуми тоҷик аз қадимулайём бо меҳмоннавозии худ шуҳрат дорад ва ҳамеша кушиш менамояд, ки дӯстӣ, ваҳдат ва ҳамдигарфаҳмиро ривоҷ дода, ҳамкориро бо давлатҳои дӯсту ҳамсоя таҳким бахшад. Ҷашни байналмилалии Наврӯз, ки ҳамчун рамзи муттаҳидкунанда дар ҷаҳон эътироф шудааст, занони минтақаҳо, хусусан, мо, давлатҳои ҳамсояро водор месозад, ки дар ҳифз ва нигаҳдошти анъанаҳои наврӯзӣ саҳми назаррас гузорем, изҳор дошт Бунафша Файзиддинзода.

Мо, занон, таваҷҷуҳи сарони давлатҳо ва саҳми онҳоро дар таҳкими равобити байни кишварҳоямон, инчунин, мусоидат ба баробарӣ ва тавсеаи имкониятҳо барои занон, ки ҷузъи ҷудонашавандаи саъю кӯшиши муштараки мо барои рушди муносибатҳои устувор ва мутақобилан судманд мебошад, хеле қадр мекунем.

Хирадмандию азми роҳбарони давлатҳои мо барои мо, занон, дар ободии ҷомеа намунаи ибрат аст. Аз ин рӯ, моро зарур аст, ки минбаъд низ барои беҳбуд бахшидан ба зиндагии занон ва оилаҳо дар минтақа бо такя ба анъанаҳо, фарҳанг ва арзишҳои ғании аҷдодон саҳми назаррас гузорем.

Итминон дорем, ки ин форум ба ҳифзу густариши анъанаҳои таърихии мо, ҳамсоягии нек, таҳкими нақши занон дар ҷомеа ва дастгирии арзишҳои оилавӣ мусоидат менамояд, гуфт Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода.

Иштирокчиён зимни ҷаласаҳои панелии форум масъалаҳои суннатҳои муштараки мардуми Осиёи Марказӣ, нақши ҷашни Наврӯз дар таҳкими равобити дӯстонаи давлатҳои Осиёи Марказӣ, инчунин саҳми занон дар таҳкими сулҳ ва рушди иқтисодии минтақаро баррасӣ намуданд.

Форуми мазкур барои табодули таҷриба, таҳкими ҳамкорӣ ва рушди ташаббусҳои нав, ки ба дастгирии занон ва таҳкими нақши онҳо дар ҷомеа нигаронида шудааст, як платформаи беназир фароҳам меорад.